SPAK ka mbyllur hetimet për akuzat e ngritura ndaj Presidentit të Partisë së Lirisë, Ilir Meta, ish-bashkëshortes së tij Monika Kryemadhi dhe personave të tjerë të përfshirë në këtë çështje. Por ndërsa pritej që Ilir Meta të njihej këtë të hënë me përfundimin e hetimeve, avokati i tij mbrojtës, Kujtim Cakrani ka kërkuar disa ditë kohë me argumentin se ndodhet me pushime. Këtë të martë edhe Monika Kryemadhi, deputetja e Partisë së Lirisë dhe nëna e saj Fatime Kryemadhi do njihen me këtë fakt, ndërsa një ditë më parë ishte Pirro Xhixho dhe Ema Çoku ata që u njoftuan për mbylljen e hetimeve. Prokurorët Altin Dumani, Arben Kraja dhe Sotir Kllapi, i komunikuan akuzën për pastrim parash Ema Çokut dhe korrupsion pasiv ish-kreut të AKEP, Pirro Xhixho. Në 29 Maj Metës dhe Kryemadhit iu komunikuan akuzat e korrupsionit, pastrimit të parave dhe fshehjes së pasurisë. Tashmë SPAK ka mbyllur hetimet, dhe është gati të depozitojë në GJKKO dosjen për aferën CEZ-DIA, çështjen e lobimit të ish LSI në SHBA dhe hetimin pasuror.