SPAK ka dërguar për gjykim 37 të pandehur, të dyshuar si pjesëtarë të dy grupeve të strukturuara kriminale. Të pandehurit akuzohen për një sërë veprash penale, përfshirë ndihmën për kalim të paligjshëm të kufijve, falsifikimin e dokumenteve të identitetit dhe udhëtimit, prodhimin dhe shpërndarjen e dokumenteve të falsifikuara, kultivimin dhe shpërndarjen e lëndëve narkotike, si dhe shpërdorim detyre. Në mesin e veprave të rënda për të cilat do të përgjigjen para gjykatës janë edhe krijimi dhe pjesëmarrja në grup të strukturuar kriminal. Hetimi i zhvilluar gjatë viteve 2022–2024 dokumenton aktivitetin e dy grupeve kriminale që kanë ndihmuar në kalimin e paligjshëm të kufijve tokësorë, detarë dhe ajrorë, kryesisht të shtetasve shqiptarë drejt Mbretërisë së Bashkuar, SHBA dhe Kanadasë. Këto grupe siguruan dokumente të falsifikuara të vendeve të BE-së, organizuan udhëtime përmes agjencive turistike “Domi Travel” dhe “Boris Travel”, si dhe udhëzuan qytetarët për intervistat e vizave në mënyrë që të paraqiteshin si të besueshëm. Gjatë kontrolleve është zbuluar një ambient në Tiranë, i përshtatur për prodhimin e dokumenteve të falsifikuara, ku janë sekuestruar 37 vula të ndryshme institucionale, dokumente të ndryshme false, pajisje teknologjike, shuma të konsiderueshme parash dhe monedha virtuale. Ky hetim është mbështetur nga një bashkëpunim i gjerë ndërkombëtar, përfshirë autoritetet gjyqësore të Spanjës, agjencitë amerikane të sigurisë, si dhe agjencitë ligjzbatuese të disa vendeve të tjera.