Qeveria amerikane po heton në një seri incidentesh shëndetësore në kryeqytetin austriak Vjenë, në të cilët janë përfshirë diplomatë të saj dhe punonjës të tjerë administrate. Më shumë se 20 zyrtarë kanë raportuar simptoma të ngjashme me ato të Sindromës së Havanës, një sëmundje misterioze e trurit, që kur presidenti Joe Biden mori detyrën në janar. Sindroma është e pashpjegueshme por shkencëtarët amerikanë thonë se ka më shumë gjasa që ajo të jetë shkaktuar nga rrezatime direkte të mikro-valëve. Gjithcka u zbulua fillimisht në kubë në vitet 2016-2017. Diplomatët amerikanë dhe kanadezë në Havana u ankuan asokohe për simptoma që varionin nga lodhja, humbja e ekuilibrit, humbje dëgjimi dhe ankth. SHBA akuzoi Kubën se kishte kryer sulme sonike, akuzë kjo që Havana e mohoi me forcë dhe incidenti coi edhe në një rritje tensionesh mes dy vendeve. Në 2019, një studim akademik amerikan gjeti anomali në trurin e diplomatëve që ishin sëmurur, por kuba e hodhi poshtë raportin. Rastet në Vjenë u raportuan fillimisht nga revista the Neë Yorker dhe më vonë u konfirmuan nga departamenti amerikan i shtetit që tha se po kryhej një hetim intensiv. Reuters ndërkohë citon ministrinë e jashtme austriake që thotë se po punon me autoritetet amerikane për të zbardhur rastin. Vjena prej kohësh ka qenë një qendër për aktivitet diplomatik dhe ka patur reputacion edhe si vatër e nxehtë spiunazhi, vecanërisht gjatë luftës së ftohtë. Vende si SHBA, kanë një prani të madhe diplomatike atje.