SHBA dhe Irani zhvillojnë negociata në kryeqytetin pakistanez Islamabad të shtunën, duke kërkuar t'i japin fund luftës së tyre gjashtëjavore, megjithëse Teherani i vuri në dyshim bisedimet duke thënë se ato nuk mund të fillonin pa angazhime për Libanin dhe sanksione. Delegacioni amerikan, i udhëhequr nga zëvendëspresidenti JD Vance dhe që përfshin të dërguarin special të Presidentit Donald Trump, Steve Ëitkoff, dhe dhëndrin e tij, Jared Kushner, mbërritën në Islamabad pas një ndalese për furnizim me karburant në Paris. Delegacioni iranian, i udhëhequr nga kryetari i parlamentit Mohammad Baqer Qalibaf dhe ministri i jashtëm Abbas Araqchi, mbërriti në Pakistan të premten. Qalibaf tha në platformën X se Uashingtoni kishte rënë dakord më parë për të zhbllokuar asetet iraniane dhe për një armëpushim në Liban, ku sulmet izraelite ndaj militantëve të Hezbollahut të mbështetur nga Irani kanë vrarë gati 2,000 njerëz që nga fillimi i luftimeve në mars. Ai tha se bisedimet nuk do të fillonin derisa të përmbusheshin këto premtime. Izraeli dhe SHBA-të kanë thënë se fushata në Liban nuk është pjesë e armëpushimit Iran-SHBA, ndërsa Teherani këmbëngul për të kundërtën. Qalibaf tha ndërkohë se Irani ishte gati të arrinte një marrëveshje nëse Uashingtoni ofronte atë që ai e përshkroi si një marrëveshje të vërtetë dhe i jepte Iranit të drejtat e tij, raportuan mediat shtetërore iraniane. Presidenti amerikan Donald Trump shkroi pas kësaj deklarate në Truth Social se e vetmja arsye pse iranianët janë gjallë, është për të negociuar një marrëveshje. "Iranianët nuk duket se e kuptojnë se nuk kanë asnjë kartë në dorë, përveç një zhvatjeje afatshkurtër të botës duke përdorur rrugët ujore ndërkombëtare. E vetmja arsye pse ata janë gjallë është për të negociuar!" tha ai.