Shtetet e Bashkuara të Amerikës dhe Irani zhvilluan bisedime në Islamabad të Pakistanit, me qëllimin për të arritur armëpushim që pas përshkallëzimit të konfliktit në Lindjen e Mesme më 28 shkurt pas përfshirjes së Amerikës në sulme krah Izraelit. Delegacioni iranian udhëhiqet nga kryetari i parlamentit Mohammad Bagher Ghalibaf, ndërsa ai amerikan nga zëvendëspresidenti i SHBA-së JD Vance, i shoqëruar nga i dërguari i Shtëpisë së Bardhë, Steve Ëitkoff, dhe dhëndri i Presidentit Trump, Jared Kushner. Shtëpia e Bardhë tha se bisedimet në Islamabad janë "ballë për ballë", ku në një dhomë diskutimet po zhvillohen mes zyrtarëve amerikanë, iranianë dhe pakistanezë. Mediat ndërkombëtare raportojnë se negociatat në Islamabad kanë ecur mirë, por çështja që shkakton mosmarrëveshjen më të madhe mes palëve mbetet Ngushtica e Hormuzit. Teksa palët ishin në tryezën e bisedimeve, presidenti amerikan, Donald Trump, njoftoi përmes një mesazhi në rrjetet sociale se “Ngushtica e Hormuzit do të hapet së shpejti, dhe se tashmë po pastrohet nga minat e vendosura nga iranianët”. Ndërkohë u raportua se një anije amerikane po kalonte për herë të parë në Ngushticë, por Komanda Qendrore e SHBA-së njoftoi se dy anije amerikane ndodhen në Hormuz për një operacion pastrimi nga minat. Pakistani është mikpritës i negociatave kyç mes Shteteve të Bashkuara dhe Iranit, teksa në fuqi është armëpushimi i brishtë, i arritur më 7 prill. Këto pritet të jenë bisedimet në nivelin më të lartë mes SHBA-së dhe Iranit që nga Revolucioni Islamik i vitit 1979 dhe negociatat e para zyrtare ballë për ballë mes dy palëve që nga viti 2015, kur u arrit marrëveshja për programin bërthamor të Iranit. Donald Trump e anuloi këtë marrëveshje në vitin 2018, gjatë mandatit të tij të parë.