Presidenti amerikan Donald Trump tha se nuk shqetësohej për rezultatin e bisedimeve SHBA-Iran në Pakistan, duke këmbëngulur se Shtetet e Bashkuara e kishin fituar luftën. "Nëse bëjmë një marrëveshje apo jo, nuk ka rëndësi për mua. Arsyeja është sepse kemi fituar", u tha Trump gazetarëve. "Ne jemi në negociata me Iranin. Ne fitojmë pavarësisht kësaj. Ne i kemi mposhtur ata ushtarakisht", tha Trump. Trump foli ndërsa Zëvendëspresidenti JD Vance po udhëhiqte delegacionin amerikan në kryeqytetin pakistanez Islamabad, ku diskutimet 21 orëshe me Iranin në përfundim nuk dhanë asnjë rezultat. Trump përsëriti gjithashtu deklaratën e ushtrisë amerikane se anijet luftarake të Marinës Amerikane kaluan nëpër Ngushticën e Hormuzit, të shtunën, portën jetësore për në Gjirin e pasur me naftë, për të filluar pastrimin e tij nga minat iraniane. Raporti u mohua nga Irani, i cili ka ushtruar kontroll mbi kanalin e ngushtë ujor dhe bashkë me të edhe mbi furnizimin me naftë të botës, në shenjë hakmarrje për sulmin e nisur më 28 shkurt nga Shtetet e Bashkuara dhe Izraeli. "Kemi minapastrues atje. Po pastrojmë ngushticën", tha Trump. "Do ta hapim ngushticën edhe pse nuk e përdorim, sepse kemi shumë vende të tjera në botë që e përdorin atë, të cilat ose janë të frikësuara, ose të dobëta", tha Trump. Ai shprehu përsëri zhgënjim me aleatët e NATO-s, që qëndruan në mënjanë gjatë luftës dhe nuk u konsultuan paraprakisht. "Ne nuk u ndihmuam nga NATO", tha Trump.