Statusi i bazave ushtarake qipriote të Britanisë nuk është në negociata, tha ministri i Forcave të Armatosura Al Carns për britaniken The Telegraf. Ai këmbënguli se dorëzimi i sovranitetit mbi Akrotirin dhe Dhekelian do të ishte jashtë diskutimit gjatë bisedimeve të afërta me qeverinë qipriote. “Duhet të jemi shumë të qartë për këtë, statusi ligjor i bazave sovrane është i fortë si shkëmbi”, tha ish-oficeri i lartë në Marinën Mbretërore. Pas shpërthimit të luftës në Lindjen e Mesme, presidenti i Qipros njoftoi planet për të rinegociuar të ardhmen e bazave “koloniale” të Britanisë. Pavarësisht se ishin rreth 320 km larg, Irani dhe grupet e lidhura me të lëshuan raketa balistike dhe dronë drejt Qipros, e cila strehon forcat britanike dhe amerikane, në hakmarrje për fushatën ushtarake të Donald Trump. Shqetësimet për sigurinë u shtuan më tej kur një dron kamikaz u përplas mbi një hangar që mbante dy avionë spiunë amerikanë U2 në bazën ajrore të RAF Akrotiri. Kjo i shtyu aleatët e Nikos Christodoulides, presidentit qipriot, të hartonin plane, të modeluara sipas marrëveshjes kontroverse të Britanisë për të hequr dorë nga Ishujt Chagos, për të rimarrë kontrollin sovran mbi bazat në ishull.