Drejtori i Përgjithshëm i Policisë së Shtetit, Ilir Proda, inspektoi nga afër zbatimin e masave të posaçme të sigurisë për sezonin turistik në Sarandë. I shoqëruar nga Drejtori i Departamentit për Kufirin dhe Migracionin Saimir Boshnjaku, Drejtori i policisë së Vlorës Elidon Çela dhe Drejtori i Kufirit Vlorë, Blendi Jaho, Proda zhvilloi një takim me forcat policore të angazhuara në terren, të cilët i falënderoi për përkushtimin dhe u dha porosi të qarta: Proda tha se Siguria është pasaporta e Shqipërisë për qytetarët, vizitorët dhe turistët, ndaj kërkohet më shumë angazhim, profesionalizëm dhe kujdes për çdo pushues e turist, me qëllim që këtë sezon të kemi parametra sigurie akoma më të larta se më parë. Ai kërkoi që plazhet dhe perimetri i sigurisë të jenë nën monitorim të vazhdueshëm, përmes dronëve, patrullave me biçikleta përgjatë vijës bregdetare, njësisë policore detare dhe Policisë Kufitare. Asnjë tolerim ndaj atyre që cënojnë perimetrin e sigurisë për pushuesit. Proda apeloi për kontrolle të rrepta ndaj mjeteve lundruese për dokumentacionin, kapacitetin dhe masat e sigurisë ujore dhe tha se policia do të zbatojë zero tolerancë ndaj zaptimit të hapësirave publike në plazhe.