Të tjera detaje dalin në dritë nga vrasja e Beqir Devollit mbrëmjen e së shtunës në Gjirokastër me shpërthim të telekomanduar. Burimet nga grupi hetimor bëjnë me dije se telekomanduesi e ndiqte objektivin në distancë që nga Viroi, gati tre kilometra deri në vendin ku ndodhi shpërthimi. Viktima, i njohur si “Çilo” konsumoi kafen me shokun e tij dhe më pas hipi në makinë, në të cilën ishte vendosur lënda shëprthyese. Viktima ishte kërcënuar me telefonata, së bashku me pasagjerin Erigers Mela, i cili po ashtu mbeti i plagosur nga shpërthimi. Melës iu dogj mjeti vitin e kaluar në formë paralajmërimi. Beqir Devolli ka qenë në masën “arrest shtëpie” për dy vite në Tiranë. Shpërthimi para policisë ishte i mirëmenduar, pasi autorët prisnin derisa rruga të ishte bosh, pa përsona të tjerë përreth. Paraprakisht, pista e hetimit dyshohet për një lidhje të mundshme me Artan Myrtajn, i cili u qëllua për vdekje në mes të Sarandës dy javë më parë. Mbetet ende për t’u përcaktuar motivi i atentatit, mekanizmi i aktivizimit të lëndës plasëse dhe personat përgjegjës për vendosjen e saj. Hetimet vijojnë për zbardhjen e plotë të rrethanave të shpërthimit dhe identifikimin e autorëve.