Hetimet e SPAK, për konçesionin e sterilizimit të pajisjeve kirurgjikale u iniziuan pas një kallëzimi penal të depozituar nga “Nisma Thurrje”, për shpërdorim detyre, shkelje të barazisë në tendera dhe korrupsion pasiv. Konçesioni me vlerë 100 milionë euro, vuri në lëvizje prokurorët specialë, të cilët kërkuan informacion të detajuar nga të gjitha spitalet e vendit ku ofrohen këto shërbime. Kallëzimi lidhet me konçesionin e firmosur nga ministria e shëndetësisë, në vitin 2015, kur në krye të ministrisë qëndronte Ilir Beqaj. Më herët, procesi i sterilizimit, kryhej nga vetë spitalet publike, të cilët ishin të pajisur me autoklavat përkatëse; dhe studimi i fizibilitetit mbi arsyet pse ishte i nevojshëm dhënia e këtij shërbimi me konçesion nuk u bë kurrë publik. Në kallëzimin penal, thuhet se kompania fituese e tenderit u regjistua në Qëndrën Kombëtare të Biznesit vetëm pak muaj para hapjes së procesit të tenderimit, me një kapital prej 1000 eurosh dhe me vetëm një punonjës. Fakte të cilat, sipas Nismës Thurrje, hedhin dyshime se kompania fituese nuk e kishte ekspertizën e duhur për të fituar këtë tender.