Gjykata e Durrësit ka lënë të lirë 8 të arrestuarit për zhdukjen e 49 arkave me banana në portin e Durrësit, ngjarje kjo e ndodhur rreth 10 ditë më parë. Nga 20 persona që u vunë në pranga nga efektivët e policisë, tanimë të gjithë janë liruar nga qelia. Prokurori i cështjes Afrim Shehu kërkoi nga gjykata zëvëndësimin e masës së sigurisë së për 8 personat e arrestuar. Ai kërkoi që të vendoset masa e sigurisë detyrim paraqitje si dhe kërkoi heqjen e masës së pezullimit nga detyra për punonjësit e Forcës së Sigurisë së Autoritetit Portual në Durrës. Konkretisht për Armand Murataj, Adi Qejvanaj, Shpëtim Hajdini, Adem Brasha, Veis Kuci dhe Jurgen Gjecci duke lënë në fuqi për ta vetëm masën e detyrimit për paraqitje në policinë gjyqësore. Akuzat e ngritura ndaj personave nën hetim janë për “Shpërdorim detyre” dhe “Hapje, thyerje dhe zëvendësim të shenjave të sigurisë së autoriteteve doganore”, ndërsa për dy punonjësit e kompanisë “Zico” është ngritur dhe akuza e “Kontrabandës me mallra të tjerë”.