Ukraina tha të hënën se trupat e saj kishin cliruar fshatin jugor Robotine dhe se po përpiqeshin tani të shtyheshin akoma më në jug, në kundërsulmin e tyre kundër forcave ruse. Ushtria e Ukrainës tha javën e kaluar se forcat e saj kishin ngritur flamurin ukrainas në fshatin strategjik por se po vazhdonin të kryenin operacione pastrimi atje. Forcat ukrainase besojnë se ata kanë thyer kështu linjën më të vështirë të mbrojtjes ruse në jug dhe thonë se tani do të fillojnë të avancojnë më shpejt. “Robotine është cliruar”, tha zëvendës ministrja e mbrojtjes Hanna Maliar. Fshati ndodhet 10 km në jug të qytetit të Orikhivit në rajonin e zaporizhias, në një trajektore të rëndësishme drejt Tokmakut, një rrugë dhe linjë hekurudhore shumë e rëndësishme për rusinë në zonën e okupuar prej saj. Marrja e Tokmakut do të ishte një arritje e madhe ndërsa trupat ukrainase po tentojnë të shtyhen në jug, drejt detit azov, në një përpjekje ushtarake që ka si qëllim të ndajë forcat ruse në dysh. Suksesi i Ukrainës në rimarrjen e Robotines, që rusia nuk e ka konfirmuar, pason raportet në media të një takimi këtë muaj, të shefave ushtarakë të NATO-s dhe gjeneralit më të lartë ukrainas për rishikimin e strategjisë ushtarake të vendit. Forcat ukrainase po ashtu po luftojnë kundër trupave ruse edhe në ukrainën lindore dhe progresi ka qenë atje më i ngadaltë nga sa ishte pritur për shkak të përballjes me mina pa fund toke dhe llogore ruse. Maliar e cilësoi situatën në fushëbetejë në lindje, shumë të nxehtë dhe tha se trupat ruse po mbledhin forcat e po rigrupohen dhe moska po synon të dërgojë trupat më të mira të saj atje.