Mbi 5 mijë bomba janë lëshuar mbi Iran nga forcat ajrore izraelite gjatë operacionit ushtarak, që vijon prej të shtunës. Ushtria e Izraelit njoftoi se avionët e saj luftarakë po thellojnë epërsinë në të gjithë Iranin, me fokus në Teheran, ku synohet goditja e të gjithë udhëheqësve të lartë të vendit. Izraeli ka intensifikuar sulmet edhe në Liban, ku autoritetet atje njoftuan për zhvendosjen e mbi 83 mijë njerëzve. Sulmeve nuk i kanë shpëtuar as Emiratet e Bashkuara Arabe. Autoritetet njoftojnë për më shumë se 1 mijë sulme që nga fillimi i konfliktit, përfshirë dhe sulmin me dron pranë ambasadës amerikane në Dubai dhe atë në portin e Omanit. E gjithë Lindja e Mesme vijon të jetë në kaos, mes sulmeve të SHBA dhe Izraelit dhe kundërpërgjigjes së Iranit. Me mijëra fluturime janë anuluar në të gjithë rajonin, duke prekur qindra mijëra pasagjerë. Ngushtica e Hormuzit vijon të jetë një pikë e nxehtë e konfliktit, me Iranin që ka kërcënuar mbylljen e saj, si pika kyçe e kalimit të naftës në mbarë botën. Pamjet më të fundit nga Hormuzi tregojnë anije të shumta tregtare që qëndrojnë pranë kësaj ngushtice, ndërsa lëvizja e tyre është ulur ndjeshëm pas shpërthimit të luftës.