Presidenti i SHBA-së, Donald Trump, ka deklaruar se e mori vendimin për të sulmuar Iranin, pasi shërbimet sekrete e kishin njoftuar se brenda dy javësh Teherani do të kishte gati armën bërthamore. Gjatë një tryeze në Shtëpinë e Bardhë, ka thënë se “Irani nga njëra anë bënte sikur negocionte dhe nga ana tjetër punonte me intensitet të lartë për armët bërthamore, duke mos qenë i sinqertë në negociata” Irani prej kohësh ka insistuar se programi i tij bërthamor është paqësor, por ka pasur dyshime të mëdha në këtë. Izraeli e SHBA-ja nisën sulmet ndaj Iranit të shtunën, ku në valën e parë u vranë dhjetëra udhëheqës, përfshirë edhe liderin suprem Ayetollah Ali Khamenei. Sulmet kanë vazhduar, ndërsa Irani është kundërpërgjigjur me sulme ndaj Izraelit e po ashtu ndaj bazave amerikane në Lindjen e Mesme. Irani po ashtu ka mbyllur qarkullimin në Ngushticën e Hormuzit, nga ku kalon një e pesta e naftës në botë. Izraeli të mërkurën njoftoi për fillimin e një vale të re të sulmeve në Teheran, ndërsa ushtria amerikane ka bërë të ditur se ka goditur më shumë se dy mijë objektiva në Iran që nga nisja e fushatës së saj të përbashkët të bombardimeve me Izraelin. Sipas Shteteve të bashkuara Irani ka lëshuar mbi 500 raketa balistike dhe më shumë se 2 mijë dronë.