Zyrtarët amerikanë që u përpoqën këtë fundjavë të identifikojnë dhe të sigurojnë një vend për samitin e së premtes midis Presidentit Donald Trump dhe homologut të tij rus zbuluan shpejt një pengesë të madhe: vera është kulmi i sezonit turistik në Alaskë, dhe opsionet për të pritur dy udhëheqësit botërorë, ishin të kufizuara. Kur fjala mbërriti te disa banorë të të Alaskës se Trump dhe Putin do të vinin, disa prej tyre filluan t'u drejtoheshin aleatëve të presidentit me një propozim: a mund të ishte shtëpia e tyre një opsion? Nuk është e qartë nëse këto oferta arritën ndonjëherë në Shtëpinë e Bardhë, që po kërkonte vende të përshtatshme në Juneau, kryeqytetin e shtetit, por edhe në Anchorage dhe Fairbanks. Organizatorët e samitit shpejt filluan të besonin se i vetmi qytet me mundësi të përshtatshme për samitin do të ishte Anchorage. Dhe vetëm Baza e Përbashkët Elmendorf-Richardson, në skajin verior të qytetit, do të përmbushte kërkesat e sigurisë për takimin historik, megjithëse Shtëpia e Bardhë shpresonte të shmangte optikën e pritjes së udhëheqësit rus në një bazë ushtarake amerikane. Në përfundim u vendos. Atje do të takohen të dy liderët. Samiti është ende në përgatitje e sipër, ndërsa zyrtarët amerikanë dhe rusë nxitojnë të përgatiten për takimin e profilit të lartë. Diplomatët më të lartë të të dy vendeve - Sekretari i Shtetit Marco Rubio dhe Ministri i Jashtëm Sergey Lavrov - folën të martën për të diskutuar "aspekte të caktuara të përgatitjes", sipas ministrisë së jashtme të Rusisë. Zakonisht, një samit me rrezik të lartë me një kundërshtar të SHBA-së do të paraprihej nga negociata të gjera mbi axhendën dhe rezultatet. Por vetë Trump ka thënë se po e shikon takimin si një seancë "përcaktimi", me pak pritshmëri paraprake se si do të vazhdojë. Por se si u zgjodh Alaska për takimin, mbetet ende jo fort e qartë. Rusia hezitonte për një destinacion evropian, madje edhe në një qytet si Vjena ose Gjeneva, ku udhëheqësit amerikanë dhe rusë janë takuar që nga Lufta e Ftohtë. Ndërsa vetë Putin përmendi Emiratet e Bashkuara Arabe, shumë njerëz në Shtëpinë e Bardhë shpresonin të shmangnin një tjetër udhëtim të gjatë në Lindjen e Mesme. Në fund, thanë burimet, u ra dakord për Hungarinë, kryeministri i së cilës Viktor Orbán është i afërt si me Trumpin ashtu edhe me Putinin. Por krejt papritur doli Alaska dhe zyrtarët amerikanë u kënaqën dhe u habitën kur presidenti rus pranoi një takim në tokën amerikane, një tokë që në fakt dikur ka qenë pjesë e perandorisë ruse.