Lirim Sylejmani, 49-vjeçari me origjinë nga Kosova dhe shtetësi amerikane, është dënuar me 10 vjet burg nga një gjykatë federale në Uashington për përfshirje në aktivitetet e grupit terrorist ISIS. Ai kishte pranuar fajësinë në dhjetor 2024 për marrjen e trajnimit ushtarak nga një organizatë terroriste dhe për pjesëmarrje në një përballje të armatosur kundër forcave të koalicionit të udhëhequr nga SHBA-të. Sylejmani, i njohur edhe si Abu Sulayman al-Kosovi, kishte udhëtuar drejt Sirisë në nëntor të vitit 2015 së bashku me familjen, me synimin për t’u bashkuar me ISIS-in. Pas mbërritjes, ai kreu një trajnim ushtarak 21-ditor dhe më pas u bashkua me një njësi luftarake në Mosul, Irak. Në maj të vitit 2016, Sylejmani u dërgua në vijën e parë të frontit dhe u plagos nga një shpërthim. Pas rikuperimit, ai vazhdoi të vepronte brenda ISIS-it. Ai u kap nga Forcat Demokratike Siriane më 27 shkurt 2019 dhe u mbajt në burgun Dashisha deri në shtator 2020, kur iu dorëzua autoriteteve amerikane. Krahas dënimit me burg, gjykata urdhëroi që ai të qëndrojë nën mbikëqyrje të përjetshme pas lirimit.