Historitë e shqiptarëve që janë nisur nga Shqipëria në Siri janë nga më të ndryshmet. Mes tyre ka shumë fate tragjike që janë kryqëzuar në kohë të ndryshme, por që kanë prekur edhe të njëjtat familje. Ashtu sikurse është edhe kjo e shqiptarit Ali Balliu, që është identifikuar mes të ndaluarve në burgun e Al Hassakah, në Siri. Balliu, 67 vjec, u ndalua nga forcat kurde pasi burgu ku qëndronte u shpërthye nga grupet terroriste në tentativë për të liruar pjesëtarë të ISIS. Drama e familjes Balliu nisi në vitin 2015, kur djali i tyre Idajeti vendosi të shkonte në Siri, edhe pse asokohe pretendonte se motiv i udhëtimit ishin studimet. Por atje u vra si luftëtar i Shtetit Islamik në Alepo. Pas kësaj, Aliu dhe bashkëshortja e saj Ruzhdia u nisën menjëherë drejt Sirisë, por për fatin e mirë të Ruzhdies ajo mundi të dalë nga kampi famëkeq Al Hawl dhe për fatin e keq të Aliut, ai nuk mundi të largohej me gruan e tij, por ngeci aty. Këtu nisi e gjithë zakanfilla e ngjarjes. Prej 6 vitesh, burrë e grua mbetën atje në mes të luftës, pasi misioni për të kthyer djalin në shtëpi dështoi. Ruzhdia u riatdhesua disa vite më pas, përmes operacioneve të shtetit shqiptar. Sa i përket Aliut, kohët e fundit është bërë me dije se ai është gjallë, ndërsa dyshohet se ai ndodhet në burgun e Al Hassakah.