Kryeministri Edi Rama, në një intervistë për gazetën e njohur “Bild” ka thumbuar krerët e shteteve të Bashkimit Evropian për bllokimin e anëtarësimit të vendit të tij dhe Maqedonisë së Veriut. Sipas tij, Bashkimi Europian ka “thyer premtimin” dhe po çon një përçarje në Ballkan me “cinizëm politik”. “Nëse Bashkimi Evropian me të vërtetë nuk dëshiron ta lëvizë Ballkanin Perëndimor më afër Brukselit, atëherë të paktën duhet të jetë i përgatitur të tregojë historinë e vërtetë se pse rruga e negociatave është bllokuar kudo. Kjo temë ka një rëndësi të jashtëzakonshme për vendin tonë të vogël - si një motiv përmes të cilit jeta imiton artin. Ndihem sikur po jetoj në dramën e Samuel Beckett "në pritje të Godos" ka shumë fjalë, por asgjë nuk ndodh në fund të fundit. Dhe si personazhet kryesorë të Beckett, duke pasur parasysh këtë absurd të vërtetë, ne nuk na mbetet gjë tjetër veçse të ecim përpara. Sepse Evropa është feja jonë. Dhe asgjë nuk do të ndryshojë në lidhje me të, sepse kjo është rruga e fatit tone”- është shprehur Rama për Bild. Hapja e negociatave të anëtarësimit në Bashkimin Europian për Shqipërinë dhe Maqedoninë e Veriut po lakohet,prej më shumë se një viti. Nisur edhe nga rivaliteti politik mes vendeve anëtare të Bashkimit Europian por edhe burokracitë e Brukselit nuk po merret një vendim final për anëtarësimin e Shqipërisë dhe Maqedonisë së Veriut në Bashkimin Europian.