Vendi ynë sot do të mbizotërohet nga alternime kthjellimesh dhe vranësirash duke sjellë një mot të qëndrueshëm por shumë të ftohtë. Sipas Meteoalb, sot temperaturat do të pësojnë një rënie të ndjeshme, ku do të variojnë: në zonat malore, nga -15°C në -4°C, në zonat e ulëta nga -5ºC në 02°C dhe në zonat bregdetare nga 00°C në 04°C. Era do të fryjë në drejtim Verilindor ndërsa forca e valëzimit në det do të jetë 6 ballë. Kosova sot do të mbizotërohet nga alternime vranësirash dhe kthjellimesh të cilat do të sjellin mot të qëndrueshëm në të gjithë territorin, por që herë pas here do të ketë dhe reshje bore. Temperaturat do të pësojnë një rënie të ndjeshme ku do të variojnë: në zonat malore nga -11°C në -6°C dhe në zonat e ulëta nga -8°C në -3°C. Ndërsa të gjithë ata që kanë në plan të udhëtojnë, autoriteti i Aviacionit Civil njofton se prej orës 07:00, aeroporti është në gjendje punë dhe nuk ka probleme nga kushtet klimaterike. Parashikohen vetëm vonesa të vogla dhe ndryshim oraresh në fluturimet e sotme. Sot në mëngjes është kryer ulja e avionit që vinte nga Bari, në orën 07:30. Ky fluturim bëri ulje të detyruar mbrëmë në orën 01:00 në bari si pasojë e motit të keq në Tiranë, njofton autoriteti i aviacionit. Po ashtu, nuk ka pasur vonesa në fluturimet nga Tirana në Frankfurt, në Bergamo.