Shqipëria u pushtua nga flakë masive zjarri, gjatë muajve qershor – korrik, për shkak të temperaturave të larta që përfshinë gjithë Europën. Zëvendësministrja e Mbrojtjes Dallëndyshe Bici, në një deklaratë për mediat, bëri bilancin e vatrave të zjarrit në vendin tonë, ku gjatë 24 orëve të fundit janë vënë nën kontroll 20 vatra zjarri, ku 10 prej tyre kanë qenë më problematike. Janë shuar dy vatrat në Qarkun e Vlorës, ajo në fshatin Qesarat dhe në kodrat me ullinj të Pusit të Mezinit në qarkun e Vlorës. Në qarkun e Durrësit është neutralizuar vatra në “Makaresh”, zonën e Krastës, në fshatin Bizë për të cilën është luftuar prej dy ditësh, në varrezat e vjetra të Durrësit si dhe në Gjirin e Lalzit duke shmangur rreziqet për zonat e banuara. Është shuar një vatër e raportuar në Vorë në fshatin Marikaj dhe fshatin Dushk në bashkinë Lushnje. Bici nënvizoi se në menaxhimin e situatës së zjarrit, janë angazhuar më shumë se 3000 forca të armatosura, forca zjarrfikëse, policia e shtetit dhe forca vullnetare. Në bilancet e ministrisë së mbrojtjes në vetëm dy muaj u shënuan 220 vatra zjarri të shtrira në 42 bashki, ku situata më kritike u shfaq në Fier, Shkodër, Vlorë dhe Tiranë. Zëvensëministrja Bici u bëri apel qytetarëve të raportojnë që në minutat e para të flakëve, për të parandaluar përhapjen e mëtejshme të zjarreve.