Kaos dhe bomba tymuese kanë shpërthyer të martën në Kuvendin e Serbisë, kur deputetët e opozitës u ngritën nga vendet e tyre dhe lëshuan mjete piroteknike në sallë. Përshkallëzimi dhe dhuna shpërthyen pasi deputetët e koalicionit qeverisës miratuan rendin e ditës, që opozita e kundërshtoi. Deputetët opozitarë iu afruan tavolinës së kryetarit të parlamentit, u përleshën me rojat e sigurisë dhe lëshuan bomba me tym të kuq e të zi dhe shpalosën në sallë një pankartë ku shkruhej “Serbia po ngrihet për të rrëzuar regjimin”. Gazetarët pjesmarrës në seancë raportuan se tymi nga mjetet piroteknike, mund të nuhatej edhe në korridoret e kuvendit. Qeveria miratoi paraprakisht rendin e ditës me 62 pika, ku përfshiheshin edhe ndryshimet në Ligjin për Arsimin e Lartë. Këto të fundit janë kërkesë e studentëve që protestojnë në Serbi, që nga shembja vdekjeprurëse e një strehe në Stacionin Hekurudhor të Novi Sadit, më 1 nëntor të vitit të kaluar që mori 15 jetë njerëzish. Në seancë duhej të miratohej edhe dorëheqja e kryeministrit të Serbisë, Millosh Vuçeviç, të cilën ai e dha më 28 janar, nën presionin e protestave të studentëve. Opozita kërkoi që në rend dite të ishin vetëm ndryshimet në Ligjin e Arsimit të Lartë, duke thënë se Qeveria që ka shpallur dorëheqjen dhe nuk mund të miratojë ligje të rëndësishme.