Tre persona u vranë nga një bombë që shpërtheu në Moskë të mërkurën, pasi dy oficerë policie iu afruan një burri që sillej në mënyrë të dyshimtë pranë vendit ku një gjeneral i lartë u vra dy ditë më parë në një tjetër shpërthim për të cilin Rusia fajësoi inteligjencën ukrainase. Një sërë figurash ushtarake ruse dhe mbështetës të profilit të lartë të luftës në Ukrainë janë vrarë gjatë konfliktit gati katërvjeçar. Inteligjenca ushtarake ukrainase ka thënë se është përgjegjëse për një numër sulmesh. Komiteti Shtetëror Hetimor i Rusisë tha se kur dy oficerë policie iu afruan një burri që po sillej çuditshëm, ata u vranë nga një pajisje shpërthyese, duke shtuar se një person i tretë u vra gjithashtu. Por hetuesit nuk specifikuan se kush ishte personi i tretë. Komisioni hetimor vetëm sqaroi se ka hapur një cështje penale për vrasjen e oficerëve të policisë dhe trafikimin e paligjshëm të mjeteve dhe lëndëve shpërthyese. "Pati një shpërthim", tha Alexander, një banor që jeton aty pranë, për agjencinë e lajmeve Reuters. "Ishte një shpërthim i fortë, si ai në makinën disa ditë më parë". Një banore tjetër me emrin Roza tha se u zgjua nga shpërthimi në orët e para të mëngjesit dhe se e gjithë ndërtesa u trondit. Kanalet jozyrtare të lajmeve në Telegram thanë se personi që kishte vendosur bombën ishte një nga të vrarët dhe se ai e detonoi atë kur iu afruan oficerët. Shpërthimi ndodhi shumë afër vendit ku u vra të hënën gjenerallejtënant Fanil Sarvarov, kreu i drejtorisë së stërvitjes operacionale të ushtrisë së Shtabit të Përgjithshëm Rus. Rusia tha se dyshonte se Ukraina qëndronte pas vrasjes pavarësisht se kjo e fundit nuk ka marrë përsipër asgjë.