Gjykata e Shkallës së Parë vendosi masën e sigurisë “Arrest në burg” për ish-Presidentin e Urdhrit të Stomatologut, Nikoll Deda, i dyshuar për tre vepra penale. Sipas hetimeve të kryera nga Seksioni për Hetimin e Krimeve Ekonomike dhe Financiare, Deda akuzohet për “Vjedhje duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”. Denoncimi u bë nga një person, i cili pretendoi se Deda kishte abuzuar me fondet publike të institucionit, duke rritur buxhetin e Urdhrit në mënyrë të pajustifikuar nga viti në vit. Nga 38.5 milion lekë në 2020, buxheti është rritur në mbi 125 milion lekë në vitin 2022, përfshirë blerjen dhe investimin në një godinë për institucionin. Hetimet tregojnë dyshime të arsyeshme se këto fonde janë keqpërdorur për përfitime personale apo të palëve të treta. Prokuroria gjithashtu thekson se Deda ka shmangur qëllimisht hetimin, duke rritur rrezikun e ikjes dhe pengimit të drejtësisë. Nikoll Deda, i cili ndodhet aktualisht në një proces tjetër penal për një vepër të ngjashme, akuzohet edhe për manipulim të vendimmarrjeve të Këshillit Kombëtar të Urdhrit, përmes punësimit të familjarëve dhe përqendrimit të kompetencave në mënyrë abuzive që prej vitit 2016. Prokuroria vlerëson se masa e arrestit është e domosdoshme për të garantuar zhvillimin e mëtejshëm të hetimeve dhe për të shmangur tentativat e ndikimit në prova apo në procesin gjyqësor.