Një avion jordanez ka hedhur nga ajri pajisje mjekësore jetike dhe ushqime në një spital fushor në Rripin e rrethuar të Gazës të dielën gjatë mbrëmjes, rreth dy javë pasi nisi lufta mes Izraelit dhe Hamasit. Lajmi u konfirmua të hënën në mëngjes nga vetë Izraeli dhe Jordania. Ushtria e Izraelit tha të hënën se u “koordinua” me Jordaninë që ajo ta furnizojë nga ajri një spital fushor në Rripin e Gazës. “Gjatë natës, në koordinim me Forcat Mbrojtëse të Izraelit, një aeroplan jordanez hodhi nga ajri pajisje mjekësore dhe ushqim në Spitalin Jordanez në Rripin e Gazës”, tha Ushtria e Izraelit në një komunikatë. Sipas saj, pajisjet mjekësore do të përdoren nga stafi mjekësor për pacientët. Ndërkohë, mbreti i Jordanisë, Abudallah II, tha të hënën në mëngjes se vendi i tij dërgoi gjatë natës “ndihma urgjente mjekësore” në spitalin fushor. “Është detyra jonë t’u ndihmojmë vëllezërve dhe motrave tona të lënduar në luftën e Gazës. Ne do të jemi gjithmonë pranë vëllezërve tanë palestinezë”, tha ai. Izraeli e ka rrethuar Rripin e Gazës dhe kontrollon gjithcka që futet dhe del prej saj. Javë më parë u arrit marrëveshje për lejimin e futjes së ndihmave humanitare përmes pikëkalimit të Gazës me Egjipit, Rafah, por në sasi të kufizuar. Lufta mes Izraelit dhe grupit militant palestinez, Hamas, nisi më 7 tetor, pasi Hamasi kreu sulme në qytetet e Izraelit jugor, duke vrarë 1.400 persona e duke rrëmbyer mbi 240 të tjerë. Që atëherë, izraeli ka sulmuar rripin e gazës nga ajri, deti dhe toka, në përpjekje për të goditur dhe shkatërruar hamasin. Sipas Ministrisë së Shëndetësisë së Gazës, e cila udhëhiqet nga Hamasi, mbi 10.000 palestinezë janë vrarë nga bombardimet izraelite.