Një I vdekur dhe pesë të plagosur, ky ishte bilanci I një ngjarje të rëndë të ndodhur jashtë ambienteve të një lokali në qytetin francez të Evreux. Ngjarja sipas AFP, ndodhi rreth orës 4 të mëngjesit ku një burrë goditi me makinë një trumë me njerëz. Rasti ndodhi pas një sherri që u regjistrua në ambientet e një lokali. Njëri prej personave të përfshirë në konflikt sipas prokurorit, dyshohet se mori makinën dhe më pas I përplasi personat e tjerë jashtë ambienteve të lokalit. “Një person mori një makinë dhe me qëllim bëri marsh të kundërt me shpejtësi të lartë mes turmës”, deklaroi prokurori i Evreux, Rémi Coutin, për AFP, duke shtuar se tre persona janë arrestuar. Policia franceze ka hapur një hetim për vrasje dhe tentativë vrasjeje. Për ngjarjen reagoi edhe kryetari i bashkisë së Evreux, Guy Lefrand. “Bilanci paraprak është një i vdekur, dy të plagosur në gjendje kritike dhe tre të plagosur më lehtë”, shtoi ai, duke shprehur gjithashtu solidaritet të thellë për viktimat, familjet e tyre dhe të afërmit. Ndërkohë autoritetet po vijojnë hetimet për rastin.