Ushtria gjermane ka nevojë për 60 deri në 80.000 ushtarë të rinj shtesë dhe qeveria e vendit do të hapë rrugën për një ligj të ri të shërbimit ushtarak vullnetar. Ministri gjerman Mbrojtjes, Boris Pistorius është optimist dhe thotë se shërbimi i ri ushtarak fillimisht do të bazohet në pjesëmarrjen vullnetare. Qeveria federale dëshiron të "dërgojë një sinjal shumë të qartë: Ne mbështetemi në pjesëmarrjen vullnetare dhe do t'i arrijmë shifrat e kërkuara". Kabineti Federal pritet të vendosë për planet e shërbimit të ri ushtarak të Pistoriusit gjatë ditës. Nga viti i ardhshëm çdo i ri apo e re do të marrë një letër në shtëpi me një pyetësor nga Bundesëehr-i. Meshkujt duhet t'i përgjigjen. Vajzat mund t'i përgjigjen kësaj kërkese po ashtu. Të rinjtë pyeten nëse kanë dëshirë të kryejnë vullnetarisht shërbimin ushtarak. Më pas do të bëhet testimi i tyre. Sipas ekspertëve sidoqoftë, pjesëmarrja vullnetare nuk do të jetë e mjaftueshme ndaj duhet të bëhen përgatitje për të shkuar drejt pjesmarrjes së detyrueshme. Unioni kristian demokrat dhe ai kristiansocial, nuk e përjashtojnë ndërkohë mundësinë e kthimit të shërbimit të detyrueshëm ushtarak. Por Pistorius këmbëngul se një shërbim ushtarak si dikur nuk mund të rikthehet kaq shpejt, kjo edhe për faktin se nuk ka kazerma dhe instruktorë ushtarakë të mjaftueshëm.