Diplomati më i lartë i Shteteve të Bashkuara në Danimarkë ka riafirmuar të drejtën e Groenlandës për të përcaktuar të ardhmen e saj, pas raporteve të inteligjencës daneze që pretendojnë se qytetarë privatë amerikanë janë përpjekur të ndikojnë në territorin e Arktikut. I Ngarkuari me Punë Mark Stroh u takua me zyrtarë danezë dhe Groenlandezë në Kopenhagen të mërkurën. Danimarka e thirri atë për të dhënë shpjegime në përgjigje të një raporti nga transmetuesi publik DR, që theksonte se të paktën tre amerikanë me lidhje me Presidentin Donald Trump dyshoheshin se promovonin kundërshtimin ndaj sundimit danez në një përpjekje për të inkurajuar shkëputjen e Groenlandës. Departamenti amerikan i Shtetit tha në një deklaratë të mërkurën vonë se Stroh pati një "bisedë produktive" dhe përsëriti angazhimin e Uashingtonit për lidhje të forta si me Danimarkën ashtu edhe me Groenlandën. "Shtetet e Bashkuara respektojnë të drejtën e popullit të Groenlandës për të përcaktuar të ardhmen e tyre", tha Departamenti i Shtetit. Ai shtoi se qeveria e SHBA-së nuk kontrollon ose drejton veprimet e qytetarëve privatë dhe nuk pranoi të komentojë mbi çështjet e inteligjencës. Groenlanda, një territor gjysmë-autonom brenda Mbretërisë së Danimarkës, ka të drejtën për të shpallur pavarësinë. Trump ka shprehur vazhdimisht interes për blerjen e Groenlandës për arsye strategjike dhe nuk e ka përjashtuar përdorimin e forcës për të arritur këtë qëllim.