Shtetet e Bashkuara të Amerikës të martën i shpallën luftë ekonimike Rusisë, duke ndaluar importimin e naftës, gazit dhe qymyrit rus. Lajmi u dha nga presidenti amerikan Joe Biden mbrëmjen e së martës gjatë një konference për mediat ku foli për situatën Rusi-Ukrainë. Ndërkohë, pa kaluar 24 orë nga ky vendim, Kremlini ka akuzuar Shtetet e Bashkuara të Amerikës, me argumentin se Joe Biden po kërkon të mbjell kaos nëpër tregjet e energjisë. Dmitry Peskov, zëdhënësi i Kremlinit, deklaroi se Rusia po mendon për hapat e radhës, në mënyrë që ti përgjigjet ndalimit të naftës dhe gazit nga Biden. Që prej 24 shkurtit, kur Rusia pushtoi Ukrainën, perëndimi ndërmori sanksione të forta kundër Rusisë duke e izoluar këtë vend nga financat globale. Ekonomia e Rusisë po përballet me krizën më të rëndë që nga rënia e Bashkimit Sovjetik në vitin 1991. Peskov, i cilësoi sanksionet e Perëndimit si "dallavere armiqësore" dhe paralajmëroi se ishte e paqartë se deri ku do të shkonte turbulenca në tregjet globale të energjisë.