Mes shqetësimeve të mëdha për qasjen e administratës Trump ndaj Evropës, përfshirë luftën në Ukrainë, luftën tregtare në rritje të Presidentit Trump me kontinentin e vjetër dhe marrëdhëniet me Rusinë, sekretari i Shtetit, Marco Rubio, ka udhëtuar drejt Brukselit këtë të enjte, për Samitin e ministrave të Jashtëm të NATO-s. Sipas mediave ndërkombëtare, Rubio është shprehur se do që aleanca ushtarake NATO, të jetë e fortë. “Ne duam që NATO të jetë më e fortë, ne duam që NATO të jetë më e dukshme dhe e vetmja mënyrë që NATO-ja mund të bëhet më e fortë, më e dukshme është nëse partnerët tanë, shtetet kombëtare që përbëjnë këtë aleancë të rëndësishme, të kenë më shumë aftësi”, tha Rubio. Sakaq, presidenti Donald Trump ka paralajmëruar se mund të mos iu vijë në mbrojtje vendeve të NATO-s, që sipas tij nuk po shpenzojnë mjaftueshëm për ushtrinë e tyre. “Nëse nuk paguajnë, unë nuk do t’i mbroj”, u tha Trump gazetarëve muajin e kaluar. Vizita e Rubio në selinë e aleancës vjen në një kohë kur marrëdhëniet midis Shteteve të Bashkuara dhe Evropës janë përkeqësuar ndjeshëm, duke kaluar nga bashkëpunimi i ngushtë gjatë epokës së Biden-it në përçarje nën administratën e Trump-it.