Strukturat e Policisë dhe patrullat e policisë kanë vijuar kontrollet në terren në të gjithë vendin, për të monitoruar zbatimin e masës për parandalimin e përhapjes së COVID-19, mbajtjen e detyrueshme të maskës mbrojtëse në mjedisët jashtë shtëpisë. policia njofton se nga kontrollet e ushtuara në 48 orët e fundit nga Patrullat e Përgjithshme dhe ato të Policisë Rrugore kanë evidentuar dhe ndëshkuar me masën administrative 3.000 lekë secili, 874 qytetarë që janë konstatuar duke lëvizur pa maskat mbrojtëse. Gjatë kontrolleve janë shoqëruar në ambientet e Policisë në të gjithë vendin, 9 shtetas që nuk kanë pranuar t’i tregojnë punonjësve të Policisë dokumentin e identifikimit, të cilët pasi kanë paraqitur dokumentin janë ndëshkuar me masën administrative 3.000 lekë dhe më pas janë lënë të lirë. po ashtu gjatë kontrolleve të ushtruara në subjekte të ndryshme, shërbimet e Policisë kanë evidentuar 1 subjekt që ushtronte aktivitetin në kundërshtim me protokollet e sigurisë dhe ndaj administratorit u vendos masa administrative 1.000.000 lekë. Ndërkaq 10 qytetarë janë ndëshkuar me masën administrative 10 000 secili pasi ishin duke lëvizur në rrugë jashtë orarit të lejuar.