Qeveria serbe i është drejtuar Afrikës për të adresuar problemin e popullsisë në plakje dhe mungesës së forcës punëtore në vend. Në total, Beogradi planifikon që të japë 100 mijë leje të posaçme punësimi për punonjës nga vendet afrikane dhe interesimin më të madh e ka shprehur Gana, si pjesë të një marrëveshjeje të propozuar me qeverinë serbe. Draft marrëveshja u njoftua gjatë një konference të përbashkët për shtyp mes ministrit të Jashtëm ganez, Samuel Okedzeto Ablakua dhe homologut të tij serb, Marko Gjuriç. Mediat ganeze shkruajnë se marrëveshje përputhet me përpjekjet e qeverisë së shtetit afrikan për të krijuar mundësi për të rinjtë dhe luftuar papunësinë e lartë në vend, si dhe me qëllimin e qeverisë serbe për të ruajtur rritjen ekonomike dhe adresuar problemin e mungesës së krahut të punës, sidomos në sektorin e ndërtimit dhe atë të bujqësisë. Aktualisht, Serbia ka në fuqi një marrëveshje për lëvizjen e punonjësve të krahut me Egjiptin, ndërsa Gana shpreson që të bëhet vendi i dytë afrikan.