Me urdhër të GJKKO, SPAK ka sekuestruar 25 pasuri, që i përkisnin një grupi të dënuar për vepra penale në Belgjikë. Bëhet fjalë për procedimin pasuror që i takon vitit 2024 ndaj gjashtë personave, në kuadër të goditjes së krimit të organizuar nëpërmjet masave parandaluese ndaj pasurisë. Sipas hetimeve, këta persona rezultojnë të dënuar nga drejtësia belge për vepra penale si “Vjedhja” në kuadër të një grupi të strukturuar kriminal. Pasuritë e sekuestruara përfshijnë nëntë pasuri të paluajtshme, një subjekt tregtar, tre makina dhe tre motorë, 77 mijë e 360 euro, 2 milionë e 55 mijë lekë, 1 mijë e 150 paund britanik si dhe aksesorë me vlerë dhe pajisje elektronike. Këto pasuri janë sekuestruar për shkak të dyshimeve të arsyeshme se janë përfituar nga aktivitet kriminal dhe nuk justifikohen me burime të ligjshme. Disa nga këto sende ishin sekuestruar më herët gjatë kontrolleve të banesave për llogari të kërkesave nga autoritetet belge.