Një avokat përfundoi në pranga këtë të premte. Ai akuzohet për korrupsion dhe se kishte marrë garanci nga një gjykatëse, e cila do të lironte një të burgosur përkundrejt një vlere prej 4 milionë lekësh. Ky është përfundimi i SPAK lidhur me ngjarjen e Elbasanit, ku përveç avokatit në pranga përfundoi edhe gjyqtarja Zamira Vyshka. Por, nuk është rasti i parë. Pak kohë më parë, hetimet për ngjarjet kriminale në vend treguan se bandat kanë bashkëpunim me zyrtarë të ndryshëm. Madje, në një aksion të zhvilluar nga SPAK u konfirmua se pjesë e grupeve ishin një avokat dhe një efektiv policie. Këta të fundit me një rol kyç në vënien në funksion të skemave mafioze. Alban Bengasi dhe Leonard Palushi ishin pjesë e listës së 32 urdhër arresteve të lëshuara nga SPAK. Ky është rasti kur profesioni i avokatit zhvishet plotësisht nga misioni që e karakterizon për t’i shërbyer drejtësisë. Nuk është hera e parë kur emri i një avokati lidhet me botë e krimit, madje në një shkallë aq të lartë sa urdhëron vrasjen e një personi.