Një numër liderësh nga Lindja e Mesme dhe Evropa janë mbledhur në Kajro, Egjipt në një samit për të diskutuar mbi zbutjen e konfliktit Izrael-Gaza, që prej dy javësh është shndërruar në një luftë të hapur. Mes pjesëmarrësve ishte edhe presidenti palestinez Mahmoud Abbas, i cili në fjalën e tij hapëse theksoi se populli palestinez nuk do të detyrohet të largohet nga tokat e tij. "Ne kurrë nuk do të pranojmë zhvendosjen, ne do të mbetemi në tokën tonë pavarësisht nga sfidat," tha ai. Abbas është kreu i Autoritetit Palestinez, i cili ka kontroll mbi zonat e Bregut Perëndimor të pushtuar, por jo mbi Rripin e Gazës të drejtuar nga Hamasi. Egjipti dhe shtetet e tjera arabe kanë thënë më parë se një fluks masiv i refugjatëve palestinezë që ikin nga lufta do të ishte i papranueshëm, sepse do të përbënte dëbimin e palestinezëve nga toka e tyre.