Kryeministri holandez Mark Rutte, një aleat i vendosur i Kievit dhe një kritik i presidentit rus Vladimir Putin, do të pasojë Jens Stoltenberg në postin e shefit të NATO-s, njoftuan mediat holandeze të martën, pasi Hungaria dhe Sllovakia e mbështetën atë. Duke folur në një konferencë shtypi së bashku me Sekretarin e Shtetit të SHBA Antony Blinken në Uashington, Stoltenberg as nuk e konfirmoi dhe as nuk e mohoi raportin e mediave. "Me njoftimin e kryeministrit hungarez Viktor Orban, mendoj se është e qartë se jemi shumë afër një përfundimi ... për të zgjedhur sekretarin e ardhshëm të përgjithshëm, dhe mendoj se ky është një lajm i mirë," u tha ai gazetarëve ndërsa lëvdoi Rutten. "Unë mendoj se ai është një kandidat shumë i fortë. Ai ka shumë përvojë si kryeministër. Ai është një mik dhe koleg i ngushtë ndaj edhe besoj fuqishëm se shumë shpejt aleanca do të ketë vendosur për pasardhësin tim," tha Stoltenberg. "Dhe kjo do të jetë dicka e mirë për të gjithë ne, për NATO-n dhe gjithashtu për mua". Sekretari i ardhshëm i Përgjithshëm i NATO-s do të përballet me sfidën e vazhdimit të mbështetjes së Ukrainës kundër pushtimit të Rusisë, ndërsa do të duhet edhe të ruhet nga çdo përshkallëzim që mund ta tërheqë aleancën ushtarake drejtpërdrejt në një luftë me Moskën. Në dy vitet që kur Rusia nisi pushtimin e saj në shkallë të plotë, Rutte ka qenë një nga forcat shtytëse pas mbështetjes ushtarake të Evropës për Ukrainën, duke theksuar vazhdimisht atë që ai tha se ishte nevoja absolute për një disfatë ruse në fushën e betejës për të siguruar paqen në Evropë. Nën udhëheqjen e tij, Holanda ka rritur shpenzimet e mbrojtjes mbi pragun prej 2% të PBB-së që kërkohet nga anëtarët e NATO-s, duke ofruar avionë luftarakë F-16, artileri, drone dhe municione për Kievin, si dhe duke investuar shumë në ushtrinë e saj.