Marinat britanike dhe norvegjeze do të gjurmojnë së bashku nëndetëset ruse, ndërsa kërcënimi i luftës vazhdon të përshkallëzohet në të gjithë Evropën. Pakti i parë i mbrojtjes i këtij lloji do të nënshkruhet në Doëning Street, si pjesë e një marrëveshjeje prej 10 miliardë Paundësh për anije luftarake mes Mbretërisë së Bashkuar dhe Norvegjisë. Marrëveshja synon mbrojtjen e kabllove kritike nënujore në Atlantikun e Veriut, të cilat janë nën kërcënim në rritje nga Moska. Ministria e Mbrojtjes zbuloi se ka pasur një rritje prej 30 përqind të anijeve ruse të vërejtura në ujërat e Mbretërisë së Bashkuar në dy vitet e fundit. Mbretëria e Bashkuar dhe aleatët e saj të NATO-s janë bërë gjithnjë e më të shqetësuar për rrezikun që Moska paraqet për kabllot dhe tubacionet nënujore, mes tensioneve të rritura pas pushtimit të Ukrainës. Sulmet ndaj infrastrukturës nënujore mund të shkaktojnë "probleme katastrofike" në sistemet financiare dhe të komunikimit në të cilat mbështeten britanikët, paralajmëroi Komiteti i Strategjisë së Sigurisë Kombëtare në një raport të shtatorit. Njoftimi vjen ndërsa Kryeministri Sir Keir Starmer pret homologun e tij norvegjez Jonas Støre në bazën e RAF Lossiemouth në Skocinë veriore. Të dy udhëheqësit do të bisedojnë me ekipet e patrullave detare P-8 që kanë ndjekur anijet ruse, përfshirë anijen spiune Yantar, e cila kohët e fundit drejtoi lazerët drejt njërit prej avionëve. Kjo është marrëveshja më e madhe e mbrojtjes që Norvegjia ka nënshkruar ndonjëherë dhe hera e parë që Britania shet anije të reja luftarake për më shumë se gjysmë shekulli.