Presidenti Vladimir Putin tha në një intervistë të publikuar të enjten se Rusia do të marrë kontrollin e plotë të rajonit Donbas të Ukrainës me forcë, nëse trupat ukrainase nuk tërhiqen, diçka që Kievi e ka refuzuar kategorikisht. "Ose i çlirojmë këto territore me forcën e armëve, ose trupat ukrainase largohen nga këto territore", tha Putin për India Today përpara një vizite në Neë Delhi, sipas një klipi të shfaqur në televizionin shtetëror rus. Ukraina thotë se nuk do t'i dhurojë Rusisë territorin e saj që Moska nuk ka arritur ta fitojë në fushën e betejës, dhe Presidenti ukrainas Volodymyr Zelenski ka thënë se Moska nuk duhet të shpërblehet për një luftë që e ka filluar vetë ajo. Rusia aktualisht kontrollon 19.2% të Ukrainës, përfshirë Krimenë, të cilën e aneksoi në vitin 2014, të gjithë Luhanskun, më shumë se 80% të Donetskut, rreth 75% të Khersonit dhe Zaporizhias, si edhe pjesë të rajoneve Harkiv, Sumy, Mykolaiv dhe Dnipropetrovsk. Rreth 5,000 km katrorë tokë të Donetskut mbeten nën kontrollin ukrainas. Në diskutimet me Shtetet e Bashkuara mbi skicën e një marrëveshjeje të mundshme paqeje për t'i dhënë fund luftës, Rusia ka thënë vazhdimisht se dëshiron kontroll mbi të gjithë Donbasin dhe se Shtetet e Bashkuara duhet ta njohin në mënyrë jozyrtare kontrollin e Moskës.