Sekretari amerikan i Shtetit, Antony Blinken, paralajmëroi se bazuar në zhvillimet aktuale, duket se Rusia është “në prag” të pushtimit të Ukrainës. Ai po ashtu tha se zgjatja e stërvitjeve ushtarake Rusi-Bjellorusi shton shqetësimet. Blinken tha se Biden, është i përgatitur që deri në minutën e fundit të takohet me presidentin rus, Vladimir Putin. Pas një paralajmërimi që Biden bëri dy ditë më parë se Putini kishte vendosur tashmë që ta pushtonte Ukrainën, Blinken tha se Uashingtoni do të bëjë gjithçka që mundet për të penguar Putinin dhe për ta bindur atë që ta ndryshojë vendimin e tij. Në një intervistë për CNN, Blinken tha se Shtetet e Bashkuara dhe aleatët kanë përgatitur një pako sanksionesh ndaj Rusisë, nëse Moska vendos që ta pushojë Ukrainën. Zyrtarët perëndimorë kanë thënë se 150,000 trupa ruse janë grumbulluar afër kufijve të Ukrainës, afro 30,000 të tjera në Bjellorusi dhe mijëra të tjera në rajonet lindore të Ukrainës që kontrollohen nga separatistët që mbështeten nga Moska. Blinken tha se nëse vendosen tani sanksione ndaj Rusisë – ashtu siç ka bërë thirrje gjatë kësaj fundjave presidenti ukrainas, Volodymyr Zelenskiy do të zvogëlonte efektivitetin e tyre.