Forcat ruse kanë hyrë në periferi të qytetit të Toretskut, në Ukrainën lindore, tha ushtria ukrainase të hënën vonë, më pak se një javë pas rënies së qytetit bastion të Vuhledarit. "Situata është e paqëndrueshme, luftimet po zhvillohen në çdo hyrje në qytet", tha Anastasiia Bobovnikova, zëdhënëse e Grupit Operativ Taktik "Luhansk" për transmetuesin kombëtar të Ukrainës. “Rusët kanë hyrë në periferinë lindore të qytetit” – konfirmoi ajo. Nuk kishte asnjë koment të menjëhershëm nga ministria ruse e mbrojtjes, e cila tha më herët të hënën se forcat e saj shkaktuan dëme mbi trupat dhe pajisjet ushtarake ukrainase pranë disa vendbanimeve në zonë, duke përfshirë edhe Toretskun. Blogerët ushtarakë rusë, duke përfshirë një grup analistësh ushtarakë që drejtojnë kanalin Rybar në Telegram, thanë se trupat ruse vazhdojnë të përparojnë drejt qendrës së qytetit.