Rrokada diplomatike, propozuar nga ministria e punëve të jashtme, kaloi për shqyrtim Kuvend. Denion Mejdani, nga ambasador i Shqipërisë në Maqedoninë e Veriut, do të vijojë karrierën e tij diplomatike në Kosovë, ndërkohë që ambasadori Petrit Malaj nga Prishtina do të kalojë në kryesimin e misionit diplomatik në Shkup. Gjatë seancës dëgjimore në komisionin për europën dhe punët e jashtme, Mejdani nënvizoi peshën e madhe që ka fjala dhe mbështetja e Shqipërisë për Prishtinën zyrtare, duke garantuar se në këtë mandat do të jetë sa më i zëshëm në mbrojtje të interesit të kombit shqiptar. “Në Prishtinë çdo fjalë e Tiranës peshon dyfish dhe çdo heshtje e saj ndihet po aq. Me këtë vetëdije do e nis këtë mandat. Do të ndërtoj mbi punën e kolegut tim Malaj dhe të ekipit të ambasadës që e kanë mbajtur gjallë këtë marrëdhënie në kohë të ngarkuara, ciklesh zgjedhore, me tensione në veri dhe një aktgjykim që preku thellë ndjeshmërinë e kombit. Pas tre zgjedhjeve parlamentare Kosova duhet tja nisë turravrapit me institucione funksionale për të bërë detyrat e shtëpisë dhe për ta kthyer në shina zhvillimin ekonomik.”