Sipas rezultateve paraprake jozyrtare të Qendrës për Tranzicionin Demokratik, numrin më të madh të votave në Zgjedhjet për Kuvendin e kryeqytetit malazez, Podgoricë, e ka fituar Partia Demokratike e Socialistëve e ish presidentit Milo Gjukanoviç. Partia e ish presidentit mori rreth 30 për qind të votave duke fituar 19 këshilltarë në Kuvendin e Podgoricës që ka gjithsej 58 vende. Rezultatet paraprake tregojnë se Lëvizja Evropa Tani e kryeministrit Milojko Spajiç dhe Demokratëve fitoi 14 vende, ndërsa lista e Presidentit të Malit të Zi Jakov Milatoviç dhe Lëvizja Ura morën 6 vende. Partitë e ish-Frontit Demokratik pro-rus dhe Partisë Popullore Socialiste pro-serbe do të kenë ndërkohë 13 këshilltarë në Kuvendin e Podgoricës. Për të formuar pushtetin vendor në Podgoricë nevojitet një shumicë prej të paktën 29 këshilltarësh. Edhe pse Partia Demokratike Socialiste, e cila ishte në pushtet në Malin e Zi për tre dekada, fitoi shumicën e mandateve, është tejet e vështirë që ajo të formojë qeverinë vendore, duke qenë se partitë në pushtet, në nivel shtetëror, vazhdimisht kanë theksuar se nuk do të hyjnë në koalicion me të.