Prokuroria e Përgjithshme i është drejtuar zyrtarisht ambasadës amerikane në Tiranë për të kërkuar informacion mbi deputetin Tom Doshi i cili rikandidon në zgjedhjet e 25 Prillit. Doshi është në listën e 28 kandidatëve që Komisioni Qëndror i zmjedhjeve i ka nisur për verifikim Prokurorisë. Pak ditë më parë kryetari i KQZ-së Ilirjan Celibashi shpjegoi se “në rastin e tij, KQZ ka marrë shtysën nga të dhëna publike, që e nxitin t’i kërkojë prokurorisë informacione të tjera, veç atyre që ai ka dhënë në formularin e vetëdeklarimin, për të bërë vlerësim më të plotë mbi përputhshmërinë e kandidimit të tij për deputet. Por edhe në formularin e vetëdeklarimit ka të dhëna që shërbejnë si indicie për KQZ-në, për të kërkuar hetim të thelluar për kandidatin” - tha Celibashi. Në letrën drejtuar ambasadës amerikane, Prokuroria e Përgjithshme kërkon të dijë informacionet që ajo disponon rreth Tom Doshit, të cilin në 2018-tën Departamenti amerikan i Shtetit e shpalli person non grata e i ndaloje hyrje ne SHBA se bashku me familjen. Ambasadorja amerikane Yuri Kim, në mënyrë të vazhduar ka lëshuar apele kundër rikandimit të tij. vetë Doshi u shpreh pak ditë më parë se është mbështetës i Amerikës, dhe vlerëson punën më të madhe që ajo ka bërë për shqiptarët në drejtim të reformës të drejtësisë, në të cilën u shpreh se ai vetë ka qenë njeriu kyc për kalimin e saj në parlament. Prokuroria ka nisur veprime edhe për kandidatët e tjerë, duke kërkuar fillimisht informacion nga të gjitha institucionet vendase. Bëhet fjalë për 5 kandidatë nga Aleanca ABEKO, 2 nga Bindja Demokratike, 2 nga Lëvizja për Ndryshim, 1 nga Lëvizja e Re, 6 nga LSI, 2 nga Nisma Thurrje, 4 nga Partia Demokratike, 3 nga Partia Socialiste dhe 3 nga Partia Social-Demokrate.