Top News – Richard Gere kundër Matteo Salvinit / Aktori do të dëshmojë në gjyqin ndaj ish ministrit

Richard Gere ka pranuar të dëshmojë kundër ish ministrit të brendshëm të së djathtës ekstreme në Itali, Mateo Salvini, i cili është para gjyqit pasi refuzoi të lejonte ankorimin në një port italian të një anijeje spanjolle që shpëtonte emigrantë nga mbytja, në 2019-ën. Prokurorët në Sicili kanë akuzuar Salvinin për mos kryerje të detyrës dhe për rrëmbim pasi ndaloi anijen e OJQ-së Open Arms të ankorohej në gusht 2019, në kuadër të politikës së tij të porteve të mbyllura. Në bordin e anijes ndodheshin 147 persona të shpëtuar në detin mesdhe. Gjatë krizës, ndërsa anija ishte e ankoruar pranë ishullit të Lampeduzës, disa persona u hodhën në det nga dëshpërimi. Kur Richard Gere, që në atë kohë ishte për pushime me familjen në Toskana, dëgjoi për anijen e bllokuar, ai bisedoi me OJQ-në dhe udhëtoi drejt Sicilisë për t’iu bashkuar vullnetarëve duke ndihmuar në shpërndarjen e ushqimeve për personat në bord. Aktori 72 vjecar më pas mori pjesë në një konferencë në Lampeduza dhe u shfaq edhe në një video mesazh në të cilin i kërkonte njerëzve të mbështesnin Open Arms dhe njerëzit që ajo shpëtonte. Pas 19 ditësh të gjithë emigrantët u lejuan të zbrisnin nga anija.Salvini thotë se ai vetëm kish bërë punën e tij duke refuzuar hyrjen e anijes në port. Javën e kaluar, avokatët e Open Arms, paraqitën një listë dëshmitarësh të gatshëm të dëshmojnë kundër salvinit, e mes tyre edhe Richard Gere. Nëse dënohet, Salvini mund të përballet deri me 15 vite burg.