Teksa kanë mbetur vetëm 5 ditë deri në përfundimin e procesit të regjistrimit të popullsisë së Kosovës, disa komuna kanë kërkuar që kjo datë të shtyhet. Shefi ekzekutiv i Agjencisë së Statistikave të Kosovës, Avni Kastrati thotë se ka pritshmëri që procesi të mbarojë në kohë, megjithë kërkesat e komunave. Në një konferencë për media, Kastrati ka bërë me dije se se deri më tani procesi ka shkuar sipas planifikimit, pa hasur ndonjë sfidë të madhe. Sakaq ka shtuar se sa i përket kërkesave për shtyrje të datës, do të shikojnë nëse e njëjta ka bazë që të aprovohet, pasi duhen arsye shumë të forta që një gjë e tillë të ndodhë. Ai tha se meqenëse një pjesë e madhe e regjistrueseve kanë kryer zonat e caktuara, të njëjtit mund të ndihmojnë komunat e tjera, në mënyrë që mos të ketë shtyrje të procesit.