Kryebashkiaku i Vlorës Dritan Leli është shkarkuar nga funksionet që mbante në strukturat drejtuese të Partisë Socialiste të Vlorës. Vendimi për sharkimin e tij është marrë vetëm pak ditë pasi Leli rezuzoi të jepte dorëheqjen si kryetar bashkie dhe t’i bashkohej listës së kandidatëve socialistë për qarkun e Vlorës. Kryeministri Rama e pranoi një fakt të tillë në një komunikim me mediat pasi ishin bërë publike listat e PS për të 12 qarqet e vendit. Mësohet se shkarkimi i Lelit është vendosur nga asambleja e PS së Vlorës e mbedhur të mërkurën pasdite, ku ai nuk ka qenë i pranishëm. Ndërkohë në asamblenë e PS-së së Vlorës është bërë prezantimi i kandidatëve për deputetë. Lajmin për përjashtimin e Lelit e ka bërë publik, drejtuesi politik për qarkun e Vlorës Damian Gjiknuri, i cili ka lexuar mesazhin e Ramës drejtuar asamblesë. “Dritan Leli nuk është më pjesë e jona’, thuhej në mesazhin e Ramës për anëtarët e asamblesë socialiste të Vlorës. Në listën e kandidatëve të Vlorës 7 vendet e para i kanë zënë Pranvera Resulaj, Anduel Tahiraj, Vullnet Sinaj, Anila Denaj, Niko Kuri, Ilir Metaj dhe drejtuesi politik i këtij qarku Damian Gjiknuri mban numrin shtatë. Ndërsa kryesocialisti ka preferuar të jetë i 8-i në kandidimin e zgjedhjeve të 25 prillit. Sipas Ramës, objektivi bazë i PS-së është fitimi i 78 vendeve në Parlament, ndërsa objektivi maksimal është ai i 88 mandateve.