Në raportin për klimën e biznesi, Departamenti Amerikan i Shtetit vlerëson potencialin e ekonomisë shqiptare, por korrupsioni, pasiguria mbi pronësinë, konkurrenca e pandershme dhe mungesa e fuqisë punëtore vijojnë të jenë ndër shqetësimet kryesore për investitorët. Sipas DASH, ekonomia shqiptare u rrit me 3.7% gjatë vitit 2025, ndërsa inflacioni zbriti në rreth 2.2%. Borxhi publik ndaj PBB-së ra në 52.6%, nga 75% që ishte në vitin 2021. Një nga zhvillimet më të rëndësishme është rritja e investimeve të huaja direkte. Sipas të dhënave të raportit, FDI arriti në 1.84 miliardë dollarë në vitin 2025, niveli më i lartë i regjistruar deri tani, ndërsa stoku total i investimeve të huaja arriti në rreth 17 miliardë dollarë. Por përtej shifrave pozitive, DASH evidenton një sërë problematikash. Korrupsioni mbetet një prej shqetësimeve kryesore të investitorëve të huaj, së bashku me konkurrencën e pandershme, informalitetin dhe dobësitë në prokurimet publike.