Kur kanë mbetur pak më shumë se dy muaj nga zgjedhjet parlamentarë të 25 prillit, përmes një statusi të gjatë në rrjetet sociale, kryeministri dhe kryetari i PS Edi Rama ka renditur arsyet se përse kërkon një mandat të tretë. Rama thotë se për të shlyer borxhet që i ka familjes sidomos djalit të vogë 6 vjeçar Zahos, nuk do ta kërkonte mandatin e tretë si kryeministër i maxhorancës. “Mandatin e Tretë s'do ta kërkoja, po do të kthehesha më në fund në shtëpi për të shlyer borxhet e mëdha që i kam familjes, e sidomos më të voglit nga ne të pestë, nëse nuk do të kishte ende plot gjyshër, prindër e fëmijë që duhen futur të gjithë, deri në fund, në shtëpi e në lagje të reja; nëse nuk do të duhej fituar lufta me Covidin dhe kryer vaksinimi i plotë i njerëzve të këtij vendi, duke kapërcyer një mal me vështirësi; nëse nuk do të duhej përmbyllur reformimi i shëndetësisë”, thote Rama në statusin e tij. Duke vijuar më tej argumentin e tij për Shëndetësinë kreu i qeverisë tha se rimëkëmbja e sistemit duhet përfunduar duke larguar nga trupa e bluzave të bardha abuzuesit dhe batakçinjtë që njollosin punën e profesionistëve. “Nëse nuk do të duhej forcuar progresiviteti i taksimit në favor të atyre që fitojnë më pak, rritur më tej paga minimale dhe pagat në tërësi, tanimë që bazat e ekonomisë janë forcuar, zhvilluar më në fund infrastruktura portuale e aeroportuale, e cila nuk është më një ëndërr po një betejë e nisur konkretisht”, thote ai ndërsa shpjegon arsyet për mandatin e tretë. Sipas Ramës askush tjetër përveç tij dhe PS nuk kanë eksperiecën, ambicien dhe vullnetin për të drejtuar vendin. Ai kujton edhe situatën e krijuar pas tërmetit të 26 nëntorit 2019, kur shumë njerëz u shprehën skeptikë për rindërtimin që kushedi sa zgjaste. Por sipas Ramës banorët e zonave të prekura përditë janë duke hyrë në shtëpitë e reja. Rama shprehet optimist edhe për përmbylljen e pandemisë, ecurinë e vaksinimit dhe betejat e tjera gjatë Mandatit të Tretë që sipas tij do ta çojnë në një nivel tjetër Shqipërinë.