Një garë e ethshme armatimi mes SHBA-së dhe Kinës është duke u zhvilluar në Paqësor, ndërsa fati i Tajvanit varet në fije të perit. Uashingtoni dhe aleatët e tij po përpiqen t’i paraprijnë aftësive kineze, duke e çekuilibruar Pekinin që me gjasë po mendon të nisë një pushtim të tajvanit, një ditë. Në zemër të strategjisë amerikane është një teknologji e re që ka aftësinë të shkaktojë humbje shkatërruese në marinën kineze: raketa sulmi precize PrSM ose prizma. Raketa sapo është testuar në Australi, ku goditi një objektiv më shumë se 300 km larg, duke shënuar herën e parë që arma e prodhuar nga Lockheed Martin është përdorur nga një aleat i SHBA-së. Mund të qëllohet me sisteme artilerie Himars të prodhuara në Amerikë ose me sisteme artilerie britanike MLRS: lëshues raketash që u përdorën së fundmi nga Ukraina për të kryer kundërsulme ndaj forcave ruse dhe për të goditur thellë brenda territorit armik, duke penguar përparimin e Moskës. Deri më sot, këta lëshues janë përdorur me raketa Atacms, të cilat kanë qenë në shërbim prej më shumë se tre dekadash, me një rreze maksimale prej rreth 300 km. Por thuhet se Prizma ka një rreze prej më shumë se 500 km, me potencialin që kjo të përmirësohet në variantet e ardhshme. Dhe në fluturimin e fundit testues në Australi, raketa arriti shpejtësi 4,000 km/orë, duke lënë pas sistemet e tjera.