Sulmi me raketa e dronë i kryer nga Rusia gjatë natës në kryeqytetin e Ukrainës dëmtoi ndërtesën e delegacionit të BE-së në qytet, tha Komisioni i BE-së të enjten. Stafi i delegacionit është i sigurt, shkroi në X Presidentja e Komisionit të BE-së, Ursula von der Leyen. Ajo i bëri thirrje Rusisë të ndalojë "sulmet e saj diskriminuese ndaj infrastrukturës civile dhe të bashkohet me negociatat për një paqe të drejtë dhe të qëndrueshme". Sulmi rus vrau të paktën 15 persona në pjesë të tjera të qytetit, plagosi 38 dhe dëmtoi ndërtesa në shtatë lagje të Kievit, thanë zyrtarët ukrainas. Duke reaguar pas sulmit, Komisionerja e BE-së, Marta Kos, tha se ndërtesa e BE-së ishte dëmtuar gjatë sulmeve në zonat civile. "Unë i dënoj fuqimisht këto sulme brutale, një shenjë e qartë se Rusia refuzon paqen dhe zgjedh terrorin. Solidariteti ynë i plotë shkon për stafin e BE-së, familjet e tyre dhe të gjithë ukrainasit që po përballen këtë agresion". Në sulmin e të enjtës janë shënjestruar edhe zyrat e Këshillit Britanik në Kiev. Ky i fundit ofron programe në gjuhën angleze dhe tha në një deklaratë se zyrat e tij u "dëmtuan rëndë" dhe një roje nate u plagos. Në qershor, Moska i ndaloi qytetarët rusë që të punonin me këshillin britanik, duke pretenduar se ai ishte një fasadë për spiunët britanikë. Në total, 629 dronë dhe 31 raketa u lëshuan nga Rusia gjatë natës, duke vrarë të paktën 14 persona, mes të cilëve edhe tre fëmijë. Rusia pretendoi se kishte shënjestruar vende ushtarake në sulmet e saj, duke theksuar se kishte përdorur raketa hipersonike. Kryeministri britanik, Keir Starmer, akuzoi Vladimir Putinin për "sabotim të paqes". Ai dënoi sulmet e pakuptimta të rusisë dhe konfirmoi se zyrat e këshillit britanik ishin goditur. "Putin po vret fëmijë dhe civilë dhe po saboton shpresat për paqe. Kjo gjakderdhje duhet të marrë fund", tha Starmer.