Duhet edhe një javë që partitë politikë të dorëzojnë listat e kandidatëve në Komisionin Qëndror të Zgjedhjeve. Por, tashmë kampet e politikës janë mes dilemave të shumta për të gjetur emrat e rëndësishëm që do të garojnë në qarqe të ndryshme të vendit, e ku kërkohet maksimalizimi i votave. Tiranë është pikëpyetja më e fortë politike, ku shumë emra vip të politikës janë mes dëshirës, por edhe kontributit për një vend në listë. Diskutimet kanë përfshirë Partinë Socialiste për emrin e ish-ministrit Fatmir Xhafaj, që dha dorëheqjen, për një problem me drejtësinë që kishte në Itali i vëllai i tij. Si emër i ri renditet Toni Gogu që aktualisht mban detyrën e prefektit të Tiranës. Për herë të parë si kandidatë për deputetë do të jenë ministret Belinda Balluku e Etilda Gjonaj. Ndërsa janë mësuar emrat e deputetëve të opozitës parlamentare që do të bëjnë pjesë në listën e Partisë Socialiste. Kamza dhe Paskuqani janë zonat ku do të provojnë të thyejnë rregullat të paktën 4 deputetë të tanishëm: Ylli Shehu, Reme Lala, Halit Valteri dhe Edmond Rrushi. Elbasani ka një tjetër përballje të fortë, ku PDIU vjen me kandidatin e fortë, që pretendon një mandat. Po ashtu, lista socialiste e Elbasanit do të mbajë dhe Albana Hanën, vajzën e prokurorit të ndjerë Xhevat Hana, si dhe Erald Xhanin, këshilltarin e Taulant Ballës. Korça nuk prodhon për momentin asnjë risi, veç kandidimit të sigurt të Niko Peleshit dhe Ilir Pendavinjit, si dhe mundësinë e lartë të rikonfirmimit të Eduard Shalsit. Vendi është bosh për një zonjë brenda 3 emrave të parë, që mund të jetë edhe Blerina Gjylameti. Në Fier, të vetmit të sigurt duket se janë Gramoz Ruçi dhe Erjon Braçe, ndërsa një prej kandidatëve më interesantë, duket Luan Bregasi. Biznesmenit mund t’i besohet zona e Patosit. Haki Çako, drejtori i emergjencave mund të jetë përgjegjës për Lushnjën, ndërsa edhe Petro Koçi pritet të jetë në listën e Fierit. Lista e Beratit mban Blendi Klosin, Ermonela Felajn, ish kreun e ushtrisë Bardhyl Kollçaku, e po ashtu ish-ministrin e LSI-së, Nasip Naço.